Travel

السلام عليكم

انا خريج عين شمس اتصلات 2013 (النظام العادى الشعبى الحلو ده)

انا عايز اتكلم عن فرص الشغل برا مصر (بالتحديد اوروبا) لمجال الميكروالكترونكس (ممكن تدرج برضو الميمز والاوبتكس معاها)

معلش البوست طويل حبتين ومنعكش شويه

المجال مطلوب فى دول اوروبيه كتيره المانيا وهولندا وبلجيكا والسويد والنمسا وبريطانيا ( صعب شويه ومعنديش خبره فيها)

نقدر نصنف السوق تصنيفات متنوعه ومنها تقدر تفهم تعمل ايه عشان تلاقى فرصه

ناخد تصنيف منهم حاليا

لو صنفناه شكرات كبيره وشركات صغيره فالشركات الكبيره عندها القدره انها تجيب حد من برا اوروبا لانها ناس مخصوص كل شغلتهم الموضوع ده وعادة بيكون فى فريق كبير بعد ما الشخص دا بيمضى العقد الفريق ده بيهتم بمساعدته فى اجراءات الفيزا وايجاد سكن مؤقت ودايم ليه ونقل بيته من البلد الى كان فيها للبلد الجديد واولاده ومدارسهم والحاجات دى ودى الحاجات الى حصلت معايا

مشكلة الشركات دى طبعا ان الكل عايز يشتغل فيها فبتلاقى نفسك تعدى على مراحل كتيره جدا لحد ما تتعين ( انا عملت 7 امتحانات و7 انترفيو فى نفس الشركه لحد ما وصلت لمرحلة التعيين ) منطقى لان الشركه بتصرف كتير جدا لحد ما تعينك شركتى صرفت حوالى 2000-3000 يورو خلال مراحل الانترفيو بتاعتى من ضمنها الفندق وتذاكر الطيران وبعض الشركات الخارجيه الى بتحط الامتحان ليك وكده

لكن بوجه عام لو انت قوى فى شغلك وشخصيتك كويسه فى التعامل وشغل التيم وكده هتعدى ومن تجربتى الانترفيو بيبقى لطيف حتى لو كان صعب فانت مبتبقاش مقتول نفسيا وطبعا بيفرق من شركه للتانيه وتيم لتيم وحسب طبيعة الشغل التجربه فى حد ذاتها تستحق الصراحه

الجزء التانى من السوق الشركات المتوسطه والصغيره ودى بتكون صعب عليها انها تجيب حد من برا اوروبا عشان الاجراءات او حتى عشان معندهاش حد يعمل الاجراءات لك انت تتخيل شركه صغيره فى مصر مكونه من 20 مهندس مثلا عايزه تعين حد عمرها تماما مهتفكر تقبل حد من برا مصر هى نفس الفكره بالظبط للشركات دى انت محتاج تكون فى اغلب الاحوال جوا اوروبا لسبب ما فيكون معاك اقامه فتسهل عليهم الموضوع شويه
الشركات دى رغم انها صغيره الا انها كتيره بالذات فى المانيا وانجلترا اما الدول التانيه فعددهم مش كتير اوى يعنى لكن انت بوجه عام مبتركزش على دوله واحده انت بتركز على دول كتيره لانهم كلهم جنب بعض والتنقل سهل فبتحاول مع شركات كتيره

يبقى انت محتاج للدول دى انك تبقى موجود هنا فى طرق كتيره للموضوع ده لكن فى طريقه مشهوره جدا وهى ال internship

بيها بتيجى مده اكتر من 3 شهور فبتاخد اقامه للمده دى مش مجرد فيزا زياره مؤقته ومنها تقدر تتقلب اقامة عمل او بلو كارد لو البلد الى هتشتغل فيها بتستخدمه ( المانيا بتعمل كده) فبتكون فرصه كويسه تثبت نفسك ويكون عدك حد فى اوروبا اشتغل معاك بيقول شغلك عامل ازاى وفرصه تكون قاعد فتره بتدور وتقدر تعمل انترفيو فى الشركات الصغيره

عشان تاخد اinternship فى اماكن كتير محتاج تكون طالب وده ينطبق على الجامعات ومراكز الابحاث زى
IMEC, , IHP, Fraunhofer , Cern

فانت لو كنت مسجل ماجيستير فى مصر وقربت تخلص فرصه كويسه تاخد الخطوه دى والافضل لو تشتغل فى مصر شويه سواء فى شركه او جامعه فالناس تفضل دايما موجوده فى مصر سنتين تلاته كده ده يخلى فى دايما دم جديد فى البلد ويفضل فى انتاج بدل ما البلد تقع خالص وكمان يقوى فرصك انك تتقبل فى اى فرصه كبيره

ياريت كمان متبقاش متخيل ان تقديرك فى البكالوريوس هيقلل فرصك الماجيستير والخبره بيحسنوا الفرص جامد انا كنت جايب جيد فى البكالوريوس وشغال فى ايميك حاليا الحمدلله واعرف ناس تانيه شغالين فى شركات تانيه وكانوا نفس التقدير او اقل شويه حتى فانت متياسش المهم تفضل تحاول

الموضوع يتكتب فيه كلام كتير اوى لكن البوست بقا طويل والناس هتكسل تقراه كده لو لقيت ناس بتسال اسئله كتيره هبقى اعمل بوست مستفل اجاوب على الاسئله الى بتتكرر