قسم ميكانيكا باور

** ميكانيكا باور mechanical power engineering **

أسئلة كتيرة موجوده في ذهن طلاب كتير جدا عن القسم , سواء طلاب ثانوية عامة عندهم شغف بالموضوع , طلاب اعدادي هندسة في مرحلة اختيار القسم و أخيرا طلاب القسم الي موقفوش مع نفسهم و فهموا ماهية القسم فعلا و قد ايه القسم ده من أقوى الأقسام تأثيرا في العالم حوالينا في كل المجالات .
باختصار و بدون اطالة , ممكن نقول الاتي :
1- ايه هو قسم ميكانيكا باور ؟
هو القسم المسؤول عن تحويل الطاقة من صورها المختلفة عن طريق دراسة نقل الحركة و الطاقة و تأثيرها على الأجسام عشان نحصل على القدرة المطلوبة بأعلى كفاءة و أأمن طريقة .
طيب مفهمتش أو لسه مش مستوعب ؟ ممكن نبص لتعريف ال ASME لمهندس الميكانيكا بشكل عام :
Mechanical engineers create and develop mechanical systems for all of humankind. Concerned with the principles of force, energy and motion, mechanical engineers use their knowledge of design, manufacture, and operational processes to advance the world around us — enhancing safety, economic vitality and enjoyment throughout the world.

ميكانيكا باور ممكن نقول عليه ( قسم العظماء ) , لأنه من أقدم العلوم في التاريخ و كان أحد أهم العلوم و الركائز الي اعتمدت عليه دول كتير في نهضتها الصناعية , خصوصا انه بيشمل مجالات كتيرة جدا و مختلفة .
في العصور الوسطى، بالشرق الأوسط وجزيرة العرب كان يُطلق على الهندسة الميكانيكية مُصطلح عربي الأصل (علم الحيل الرُوحانية)، وقيل الرُوحانية نسبة إلى الطاقة وليس الروح بالمعنى الديني للّفظة. فكان يُطلق على أي آلة اسم حيلة رُوحانية.
مهندس الميكانيكا بيكون مؤهل انه يبدع و يحل المشكلات و يحلل الأدوات المتاحة ليه و يدرسها و يطبق عليها علوم الفيزياء و الطاقة و الحركة عشان توصل لهدفك .
________________________________
2- مجالات العمل في قسم ميكانيكا باور ؟
1- السيارات Automotive
2- الطائرات Aerospace
مسؤول عن تصميم و دراسة :
أ- المحرك و علم الاحتراق بحيث ينتج أعلى قدرة ممكنه بأعلى كفاءه .
ب- ال body الخارجي عن طريق دراسة ال aerodynamics .
ج - ال suspension و الشاسية و دراسة و تحليل الاجهادات .
3- محطات توليد الطاقة بأنواعها power generation
و ده يشمل محطات توليد الكهربا بأنواعها ( " غازية - حرارية - طاقة متجددة ") و من أهم الالات الي هتتعامل معاها التربينات و الكومبريسور و الpumps و الغلايات
4- البترول و الغاز الطبيعي
صيانة و تصميم الات الحفر و الالات المساعدة المختلفة , زي ما مهندس البترول ليه شغله , انتا ليك شغلك المختلف عنه
5- مكافحة الحرايق
من أهم الحاجات الموجوده في المشاريع الكبيره و الضخمة لتلافي الخسائر الفادحة نتيجة الحريق
6- التبريد و التكييف
تصميم أنظمة التبريد و التكييف في المنشئات و المشاريع الكبيرة زي نظام التكييف المركزي في المستشفيات و المجمعات و الخ .
7 - صيانات الات المصانع و خطوط الانتاج
______________________________
3- قسم ميكانيكا باور و أهم المواد فيه ؟
في اعدادي هندسة انتا بتدرس ال basics في العلوم و بتكون عندك أرضية بسيطة عن كل الأقسام , مع دخلوك قسم ميكانيكا انتا بتتعلم بشكل تدريجي و هرمي , بتبدأ بالأساسيات في القسم و بتتعمق واحده واحده في التخصص , بالاضافة انك بتدرس مواد من علوم مساعدة لازم مهندس الميكانيكا يكون على علم بيها زي مواد من قسم انتاج و مواد من قسم كهربا باور .
مبدئيا مفيش حاجة اسمها قسم سهل , كل الأقسام بتحتاج تعب و مجهود و شغل , بس لو انتا حابب المجال و دخلت القسم هتحبه و هتتحمل , لكن لو داخله عشان مجرد تمشي حياتك بشكل روتيني هتمل و هتتخنق .
و من أهم المواد الي هتقابلها و الي فهمك ليها و استيعابك ليه هيخليك تفرق و تتميز في المجال العملي بعد التخرج , و الي فعلا تبين الفرق بين مهندس الميكانيكا و الفني هي :
1- علم الديناميكا الحرارية thermodynamics
2-ميكانيكا الموائع fluid mechanics
3- انتقال الحرارة heat transfer
4- الاحتراق combustion
و دول يعتبروا أهم العلوم و الركائز الأساسية الي هتقابلها في القسم و الحياة العملية , و أي حاجه بتبقا مرتبطة بيهم بشكل أو باخر .

نقلا عن فريق هنحاول جامعة المنصورة