ازاي ابتدي

طيب ازاي أبقى أفضل أفضل الخريجين؟
حاجة من اتنين يا إما انت تقديرك عالي يا إما تقديرك نص نص.
لو تقديرك عالي فانت بسهولة نوعا ما بتعدي أول مرحلة screening لل CVs. أنا كواحد في شركة متقدملي 10x CVs عن اللي طالبها و كله لسة fresh grads فأول حاجة هأعملها هتبقى إني أبص عالتقدير. غالبا يعني لو مش كاتب بلاوي في ال CV و حاطط فيه ال minimum effort هتدخل الـ interview
في ال interview بقى خلاص مرحلة التقدير تقريبا انتهت. هنا بقى المهم اللغة، مهارات العرض و التواصل، منطقية التفكير، بالإضافة لل technical skills في الوظائف ال technical.
أما بقى لو تقديرك نص نص فلازم يبقى فيه إجابة منطقية تقديرك نص نص ليه. إجابات من نوعية يعمل ايه التعليم في وطن ضايع و الكلية بتدرس أي كلام و الحاجات دي مش بتأكل عيش. احنا أصلا بندور ازاي ندخل ال interview الأول. و بالتالي لازم ال CV يبقى هو اللي فيه الإجابة: أنا كان عندي شغف بحاجة تانية هي اللي أخدت وقتي و برعت فيها. ايه بقى الحاجة دي اللي هنبروزها و نظهرها و نخبي التقدير
1. ممكن تبقى مسابقى اشتركت فيها و حققت مركز كويس
2. ممكن تبقى كورسات أونلاين أخدتها و فيه اللي يثبت كدة
3. ممكن تكون عملت undergraduate research و نشرت حاجة
4. ممكن تكون اشتركت في نشاط طلابي و عمل نقلة في حياة حد أو مجموعة
5. ممكن تكون اشتغلت freelancer شوية وحققت نجاح
و الأهم من ده كله بقى إنك تقدر من وانت طالب تبين ده كله لدكتور المشروع بتاعك بحيث إنه لما يتسأل في آخر السنة من الشركات ترشح مين يقول اسمك من غير ما يخاف إنك تكسفه.
طبعا ده معناه إنك تعمل شغل فوق العادي في مشروع التخرج و لما تدخل ال interview إن شاء الله، تطلع تقرا النقط اللي فوق للطالب المتفوق